Prej disa javësh, situata epidemiologjike e Covid-19 në vendin tonë ka pësuar një ulje e ndjeshme dhe mbetet e qëndrueshme. Këtë e konfirmojnë dhe shifrat e publikuara nga Ministria e Shëndetësisë, teksa çdo ditë vihet re ulje e numrit të viktimave dhe infektimeve.
Një faktor i rëndësishëm është edhe vaksinimi masiv i popullsisë, teksa aktualisht mbi 600 mijë qytetarë kanë marrë një dozë të vaksinës, ku 145 mijë prej tyre kanë marrë të dyja dozat.
Por, pavarësisht kësaj, në vend ende nuk janë hequr të gjitha masat kufizuese. Për anëtarin e Komitetit Teknik të Ekspertëve, Alban Ylli ora policore duhet të shtyhet, dhe maskat nuk duhet të mbahen më në mjedise të hapura.
Në një intervistë për ‘’Tv Klan’’, Ylli u shpreh se në mbledhjen e ardhshme do të bëjë propozimet përkatëse për lehtësimin e masave.
Ndër të tjera, Ylli tha se Covid-19 si krizë globale do të mbyllet brenda këtij viti, por si një problem i shëndetit publik do vazhdojë gjatë.
Alban Ylli: ”Prej më shumë se një javë Shqipëria ndodhet në zonën e riskut të ulet dhe në këtë e matim me disa indikator të cilët janë duke u bërë më të fortë, si nga numri i rasteve ditore pozitiviteti i testimeve shtrimet në spital dhe numri i vdekjeve. Shpresoj në mbledhjen e kësaj radhë të kemi gradualisht lirimin e një a dy masave, unë personalisht do propozoj një zgjatje të orës policore deri në mesnatë dhe ndoshta një ndërrim të detyrimit për maskat në rekomandim, në mjedise të hapura. Në opinion tim Covid si krizë globale do mbyllet brenda këtij viti por si një problem i shëndetit publik do vazhdojë gjatë, do të na duhet të vaksinojmë shumë për të qenë të sigurt se nuk do kemi problem’’.
