Pas fjalimit të kryeministrit Edi Rama të mërkurën në Këshillin e Europës në Strasburg, në mbrëmje ishte organizuar një darkë pune nga misioni shqiptar. Por në këtë darkë nuk morën pjesë disa prej të ftuarve. Këtë e ka konfirmuar edhe vetë kryeministri Edi Rama, i cili në një postim në rrjetet sociale, thotë se arsyeja që kishin dhënë është se “nuk ishin ndjerë mirë pas fjalimit”.
Kreu i qeverisë ka reaguar me anë të postimeve në Twitter, pas refuzimit të ftesës nga disa anëtarë të EPP/EDC, pas përfundimit të Asamblesë së Përgjithshme të Këshillit të Europës, në lidhje me rishikimin e raportit të Dick Marty. Në deklaratën e tyre, anëtarët e EPP/EDC u shprehen se nuk marrin pjesë në darkë, pasi u ndien të fyer nga deklaratat e bëra nga kryeministri Rama. Në fjalimin e tij në KiE, Rama paraqiti një rezolutë për të rrëzuar atë të Dick Marty në vitin 2010, që ngrinte pretendimet për krime lufte dhe trafikim organesh nga udhëheqësit e UÇK-së gjatë luftës së Kosovës.
“Disa prej të ftuarve mbrëmë nuk erdhën në darkën e organizuar nga misioni ynë në Strasburg, megjithëse e kishin konfirmuar më parë! Nuk ndjehemi mirë pas fjalimit, ishte arsyeja. E mirëkuptueshme. S’ke si ndjehesh mirë kur dëgjon një histori horrori si sajesa e trafikut të organeve!
Bashkëbisedimi me ndonjërin syresh pas darkës ishte kuptimplotë. U ka rënë si rrufe në qiell të pastër! Do t’u duhet ca kohë për të analizuar faktet, kuptuar madhësinë e frikshme të gabimit të bërë një dekadë më parë dhe adresuar nevojën për korrigjimin e tij me një akt të ri.
Por është e neveritshme, që edhe për një padrejtësi kaq ekstreme dhe për një të drejtë kombëtare kaq legjitime, e kaq përtej politikës së ditës, e djathta jonë e nongratave dhe e rublave, gjen kurajon të kundërvihet e të merret me dokrra!#NjerëzPaAtdhe #KatranMeBojë”.
Por është e neveritshme, që edhe për një padrejtësi kaq ekstreme dhe për një të drejtë kombëtare kaq legjitime, e kaq përtej politikës së ditës, e djathta jonë e nongratave dhe e rublave, gjen kurajon të kundërvihet e të merret me dokrra!#NjerëzPaAtdhe #KatranMeBojë
— Edi Rama (@ediramaal) October 13, 2022
