Një ditë pasi Gjykata e Tiranës njohu zyrtarisht statutin e Kuvendit të 11 Dhjetorit, të thirrur nga ish-kryeministri Sali Berisha, anëtarë të grupit të Rithemelimit i janë drejtuar gjatë mesditës selisë së PD-së. Deputetët Flamur Noka, Belind Këlliçi dhe ish-deputeti Klevis Balliu, kanë shkuar në selinë e PD-së, ku do të shohin dyert që kanë pasur funksionin blindues, për të cilat është kërkuar që të hiqen.
Dje Gjykata e Tiranës vulosi ligjshmërinë e Kuvendit të Partisë Demokratike, të mbledhur në 11 Dhjetorin e vitit të kaluar nga Sali Berisha dhe mbështetësit e tij. Gjyqtari Agron Zhukri regjistroi të gjitha vendimet e këtij Kuvendi, duke i dhënë ligjërisht Sali Berishës siglën dhe selinë e Partisë Demokratike.
Pas këtij vendimi reagoi menjëherë kryetari i Komanduar i Partisë Demokratike, Enkelejd Alibeaj, ku e cilësoi vendimin skandaloz për njohjen e statutit të Kuvendit të 11 Dhjetorit. “Jemi njohur për vendimin e Gjykatës së Tiranës. Njohuritë e mia juridike dhe besoj njohuritë e kujtdo që njeh nga media se si zhvillohen gjyqet, për mua është një vendim në nivelet e skandalit.
Siç e dini ju edhe vetë gjyqtari ka deklaruar njohjet dhe anësinë e vet në lidhje me këtë çështje. Së dyti PD ka bërë ankim për regjistrimin e Kuvendit të datës 18 Dhjetor, është i fundit që PD ka realizuar. Çështja është në Apel bashkë me të gjithë dosjen, bashkë me të gjitha provat. Gjyqtari sot nuk ka pasur dosjen dhe ka marrë një vendim pa pasur prova, pa pasur dosje dhe mbi të gjitha pa pasur palë. Do të bëjmë kallëzim penal për gjyqtarin për “Shpërdorim detyre'”, deklaroi Alibeaj.
