Një ditë para zgjedhjeve parlamentare të Kosovës revista gjermane “Der Spiegel” ka shkruar një analizë me titullin “Një shtet i dështuar”, ku thekson se shteti më i ri i Ballkanit rezulton të jetë më i dështuari.
Ndërsa shpjegon se vendi gjendet në duart e klaneve mafioze, të cilat dolën nga lufta si pishtarë të lirisë por që nuk mundën të ndërtojnë dot një shtet demokratik dhe funksional.
Duke iu referuar raportit të shërbimit informativ gjerman, BND, Spiegel thekson se presidenti i Kosovës Hashim Thaçi është pjesë e krimit të organizuar. Ndërsa përmend organizatën “Pro Asyl”, sipas së cilës, shtetin dhe mafian në Kosovë është e vështirë t’i ndash nga njëra-tjetra.
ANALIZA E PLOTË:
Perëndimi ua ka lënë shtetin e ri kryekomandantëve; rezultati është një shtet mafioz
Lufta civile ndryshon një shoqëri. Njerëzit që në kohë paqeje renditen në shkallën më të ulët të hierarkisë, sot lehtësisht qëndrojnë lart. Prioritet kanë cilësi të tilla, si forca dhe mizoria, jo arsyeja dhe gjykimi.
Kështu ishin vitet nëntëdhjetë në Kosovë.
Problemi: Edhe sot, shoqëria kosovare është e strukturuar si shoqëri lufte; Ata që japin urdhra janë po të njëjtët.
Miliarda për elitat e korruptuara
Për të gjetur një vend që është pothuajse i copëtuar në duart e disa klaneve, duhet ta kërkojmë në Botën e Tretë. Kosova është një shtet i dështuar; një shtet i dështuar, ku krimi organizuar ka arritur në nivelin më të lartë. Sipas Interpolit, Kosova është një qendër e trafikut të drogës dhe qenieve njerëzore. Miliardat e Bashkimit Evropian të investuara në projektin K., shpesh rrjedhin në xhepat e elitave të korruptuara.
Faji i Perëndimit
Një mjerim për të cilin Perëndimi bart shumë faj
Perëndimi e ka lënë këtë shtetin e ri tek kryekomandantët, të cilët u promovuan si “luftëtarë të lirisë” gjatë luftës, por në të vërtetë ishin kriminelë lufte; mjaftueshëm për të mposhtur shtypësit serbë, por jo për të ndërtuar një vend demokratik, ekonominë e tregut, një shtet funksional ligjor dhe social. Presidenti aktual, dikur paraushtarak, përmendet në raportet e BND-së, si i përfshirë në krimin e organizuar. Sipas organizatës “Pro Asyl”, shtetin dhe mafian në Kosovë është e vështirë t’i ndash nga njëra-tjetra.
Paralizoi Bosnjën
A u interesua ndokush? Vështirë se gjejmë ndonjë
Jo më vonë se viti 2001, pas sulmeve të 11 shtatorit, Ballkani është zhdukur nga radarët e elitave politike. Pa luftë, s’ka më interes. Shoqëritë e prapambetura janë shoqëri të thyera dhe formacione shtetërore jofunksionale. Në Kosovë dhe Bosnje-Hercegovinë, tri grupe etnike grinden akoma për të menaxhuar një shtet të përbashkët. Ndryshe nga shtetet e vogla, që janë rezultat i luftërave ballkanike të viteve 1990, Bosnja mbahet e bashkuar me forcë që nga Dejtoni; është politikisht e paralizuar dhe e polarizuar thellë nga ana sociale.
Modeli Erdogan
Ashtu si më parë, elitat dhe modelet e kohës së luftës dominojnë akoma skenën politike. Të rinjtë e identifikojnë veten shumë pak me shtetin dhe rendin drejt përkatësisë etnike dhe fetare. “Shembulli për tu ndjekur” këtu nuk është BE, por një njeri i fortë, si Erdogan. Për serbët modeli është Vladimir Putin.
Vendet si Arabia Saudite, Turqia dhe Kuvajti ndërtojnë xhami dhe shkolla islame në Bosnje. Çdokush që dërgon fëmijën e tij në institucionet islame, paguhet, raporton “Tagesspiegel”.
Radikalizmi i të rinjve po rritet; disa qindra boshnjakë janë bashkuar me “Shtetin Islamik” (IS). Sipas revistës gjermane “Fakt”, IS reklamon në Kosovë kërkesa për luftëtarë.
Luftëtarët e shenjtë të viteve ‘90
Ballkani, një déjà vu
Luftëtarët e shenjtë në radhët e ushtrisë boshnjake, në vitet nëntëdhjetë provuan shijen e asaj që e mban sot botën pezull.
Muxhahidët – Vullnetarët e huaj nga vende të tilla si Afganistani, Çeçenia dhe Iraku – të cilët ishin të përfshirë në njësitë paraushtarake në luftë, kryen krime të panumërta kundër kroatëve dhe serbëve, duke përfshirë ato të prerjes së kokave, që dy dekada më vonë po praktikohen nga IS. Kapitulli i këtyre viteve të tmerrshme u anashkalua nga media. Nëse nuk ka asnjë perspektivë, historia mund të përsëritet një ditë.
Përshtati nga gjermanishtja redaksia e Tirana Today/Këtu mund të lexoni shkrimin në origjinal
