Partitë politike në Kosovë, kanë filluar tashmë fushatën për zgjedhje të parakohshme që do të mbahen më 11 qershor. Por, shumica e partive kanë vënë ‘vijat e kuqe’ për koalicion pas-zgjedhor.
Dy partitë opozitare, të cilat këto zgjedhje do të jenë me një listë zgjedhore Aleanca për Ardhmërinë e Kosovës dhe Nisma për Kosovën kanë vënë ‘vija të kuqe’ për PDK-në dhe LDK-në. Por edhe dy ish partnerët në koalicion, PDK-LDK kanë përjashtuar njëra-tjetrën për koalicion pas zgjedhor.
Sipas analistëve, në koalicionet e ardhshme nuk ka por veç interesa pragmatike. Ramush Tahiri, në një prononcim për Telegrafin ka thënë “normalisht se do t’i shkelin si kanë bërë gjithmonë deri tash. Në Kosovë politika nuk ka parime, por veç interesa pragmatike dhe klientelizëm partiak e grupor, ndarje e pasurisë buxhetore, tenderëve etj. Qëllimi është ardhja në pushtet dhe shfrytëzimi i benefiteve që sjell pushteti”.
Edhe analisti Imer Mushkolaj,u shpreh se përvojat nga e kaluara tregojnë se në përgjithësi partitë politike i shkelin “vijat e kuqe”.
