Nga: Mentor Kikia
Me shkas nga disa komente-akuza ndaj meje, lidhur me një shkrim mbi rastin e Gretës nga Mirdita, që “guxoi” të thotë se do të kandidoj për deputete.
Unë nuk i dhashë mbështetje Gretës, edhe pse personalisht do ta bëja. As partisë së saj, sepse ende nuk i kam lexuar asnjë rresht nga programi apo objektivat që ka.
As PS-së, që ata mendojnë se mbështet partinë e Gretës. As PD-së, që të tjerë mendojnë se partia e Gretës do ti marrë votat.
Nuk më interesojnë fare këto konspiracione. Demokracia është garë, kush të dojë të hidhet në fushë.
Por unë, përmes rastit të saj, më saktë sulmeve ndaj saj, kritikova mentalitetin shqiptar për të anatemuar çdo gjë të re. Maninë për ti vënë “vegjë” çdo gjëje dhe çdo kujt, pa patur as edhe një argument dhe pa e dëgjuar të flasë.
Është si të thuash, që në ekspozimin e një makinerie, në vend që të përpiqemi të mësojmë se çfarë funksionesh ka, sa procese pune bën, si ndizet e si punon, ne të përpiqemi të gjejmë mënyra se si ta prishim.
E keni dëgjuar besoj një “barsoletë”, nga ato me shqiptarë, amerikanë e gjermanë?
Kur shkojnë tek kulla Eiffel, amerikani pyet:
Sa ditë janë dashur për ta ndërtuar?
Gjermani pyet: Kush e di sa bullona janë përdorur për të lidhur hekurat?
Shqiptari pyet: Sa tritol mund të duhet për ta rrëzuar?
