Ish-ministri i Drejtësisë, Enkelejd Alibeaj ka komentuar deklaratat e ambasadores amerikane, Yuri Kim, lidhur me Reformën në Drejtësi.
I ftuar në rubrikën “Opinion” në News24, Alibeaj u shpreh se ajo e cila është e interesuar që të shkelmojë këtë reformë është mazhoranca. Sipas tij, pas reformës në drejtësi mazhoranca synon të godasë vettingun.
“E vetmja palë dhe segment që do ta ndryshojë reformën në drejtësi mund të jetë mazhoranca. Qëndrimet e ambasadores janë të forta. E vetmja pjesë që mund ta pengojë ose çojë përpara reformën në drejtësi është mazhoranca. Asnjë ndryshim ligjor nuk mund të bëhet nga ky parlament, që është i paligjshëm. Po tentohet që të goditet reforma në drejtësi në zemër të saj. Duan të godasin vettingun tani. Fajësia duhet parë tek njerëzit e mazhorancës”, tha ai.
Sipas Alibeajt, masat kufizuese të ndërmarra kanë qenë në shkelje të hapur të ligjit. Ai i mëshon faktit se vendi duhet t’i ishte nënshtruar testimeve masive.
“Masat kufizuese kanë qenë në shkelje të ligjit. Është e pakuptimtë që fundjava të jetë e mbyllur. Nuk mund të kufizohen dot qytetarët. Nuk u bënë testime masive. Qeveria dështoi duke mos bërë testime masive. Pas testimeve, duhet të ishin izoluar mbartësit simptomatikë. Edhe shtyrja duket jo-mjekësore. Qeveria ndoshta zgjat situatën për të ulur pakënaqësitë. Njerëzit janë në kushte të rënda ekonomike”, shtoi ai.
