Aleksei Navalni është opozitari më guximtar në Rusi, që i kundërvihet regjimit autokratik të Vladimir Putinit. Juristi 44-vjeçar ka mbi 4 milion ndjekës në kanalin e tij në YouTube, dhe mbi 2 milion ndjekës të Twitter.
Aty ka zbuluar vazhdimisht skandalet e mëdha korruptive të Putinit dhe oligarkëve pranë tij. Ndërkaq, ka organizuar qindra protesta në Moskë dhe mbarë Rusinë. Për këtë arsye, është arrestuar dhe burgosur disa herë.
Putin që nuk e përmend asnjëherë më emër, e ka akuzuar si një agjent në shërbim të Perëndimit. Por pa dhënë asnjë provë. Deri më sot Kremlini akuzohet për vrasjen e shumë kritikëve, brenda dhe jashtë vendit. Në gusht 2020, Navalni u helmua duke rrezikuar seriozisht jetën. Ai akuzoi direkt Putinin. Por ky i fundit tha se po të donte e kishte hequr qafe me kohë.
Putin ka 21 vite në pushtet, por ai s’do të dalë hapur si diktator. Ka nevojë për një opozitë të kontrolluar. Dhe duket se po e përdor pa dëshirën e tij Navalnin. Ndoshta për këtë arsye ai është ende gjallë.
TIRANA TODAY
