Një ditë pas përgjimeve të publikuara nga gazeta gjermane “Bild”, aleati i Bashës, Fatmit Mediu i ka bërë thirrje Presidentit, Ilir Meta që të shtyjë zgjedhjet.
Sipas Mediut, Presidenti duhet të angazhohet për të ruajtur qëndrueshmërinë e sistemit demokratik dhe duhet të shtyjë zgjedhjet. Kjo gjë duhet bërë për të garantuar unitetin e popullit nën një sistem demokratik.
Meta ka deklaruar më parë se është i gatshëm të rishikojë dekretin për datën e zgjedhjeve dhe gjithashtu të ofrojë mandatin e presidentit nëse duhet për të ulur palët në tavolinë. Kërkesës së Metës deri tani i ishte përgjigjur vetëm Kryeministri Rama për të cilin zgjedhjet nuk duhet të shtyhen.
Kjo është hera e parë që një nga anëtarët e opozitës së bashkuar i drejtohet Presidentit për të ndërhyrë në zgjidhjen e krizës politike. Kryetari i Partisë Republikane ka thënë gjithashtu dje në një takim me qytetarët e rendi kushtetues ka rënë dhe për këtë është përgjegjës Edi Rama, të cilit tashmë i është faktuar se ka cenuar procesin zgjedhor të 2017-ës.
Postimi i Mediut:
Presidenti Ilir Meta është autoriteti i vetëm kushtetues që duhet të shtyjë datën e zgjedhjeve.
Është kompetencë e tij kushtetuese të garantojë, unitetin e popullit. Konflikti që po përgatit Rama në 30 qershor, është kërcënim i hapur i interesave tona kombëtare.
Presidenti duhet të angazhohet në qëndrueshmërinë e sistemit tonë demokratik, i cili bazohet në pluralizëm dhe zgjedhje të lira dhe të ndershme. Bazohet në liritë dhe të drejtat e çdo qytetari mbi 18 vjeç, për të zgjedhur dhe për t’u zgjedhur. Rendi kushtetues ka rënë.
Liritë politike janë peng i krimit dhe korrupsionit. Me blerjen masive e votave, kercenimet nga krimi dhe Rama te provuara me faktet qe kane dale bejne te detyrueshme shperndaje në parlamentit.
Liritë ekonomike janë peng i parave të drogës, krimit, korrupsionit të lidhur me qeverinë. Pjesë nga fjala dje në Kamëz.
