Kreu i Partisë Agrare Ambientaliste, Agron Duka, ka shuar zërat, duke konfirmuar se nuk do të ketë asnjë lloj marrëveshje mes kryetarit të PD, Lulzim Basha dhe kryeministrit Rama.
Ai madje shton më tej se për këtë çështje ka folur edhe me kryedemokratin, për ta denoncuar Ramën, pasi nuk bëhet fjalë për një marrëveshje mes tyre.
“Ka një rrezikshmëri të madhe, sepse Rama është mjeshtri i PR dhe i underground-it. Ai ka përdorur dy teza, që nëse depërtojnë në masë, mund t’ia zgjasin jetën. E para, sipas tij, është se nuk ka alternativë tjetër më të mirë se ai, dhe e dyta ne do bëjmë qeveri me një vend me Bashën.
Unë i kam thënë Bashës që ta denoncojë, se vazhdimisht s’ka marrëveshje me Ramën, por me forcat opozitare dhe shoqërinë civile. Jam i bindur që është kështu, e ka thënë edhe vetë Basha. Nuk ka burrë nëne që të bëjë underground me të”, tha Duka në emisionin “360 gradë”.
