Kandidati për kryeministër të Kosovës nga Lëvizja Vetëvendosje, Albin Kurti ka thënë se presidenti Hashim Thaçi nuk ka qenë i paanshëm, ashtu siç duhej të ishte roli i tij.
Më tej, Kurti u shpreh se Thaçi nuk i ka mjetet për ta zgjidhur krizën. Në një intervistë për Jeta në Kosovë, kandidati për kryeministër deklaroi se kriza e vendit zgjidhet vetëm nëse PDK lëshon rrugë që shumica të krijojë qeverinë dhe institucionet, ndërsa shtoi se Thaçi po e shijon brenda vetes atë që Kurti e quan krizë të kryetarit të Partisë Demokratike të Kosovës, Kadri Veselit.
“Që prej periudhës parazgjedhore, e deri në vonesën që i bëri thirrjes së Kuvendit, ai qartësisht ka mbajtur anën e partisë së cilës i përket. Kjo nuk është dinjitoze nga ana e tij, edhe pse siç duket ai nuk shqetësohet fort për dinjitet. Nuk besoj se ai i ka mjetet për ta zgjidhur krizën, sepse kriza zgjidhet veç nëse PDK lëshon rrugë që shumica të krijojë qeverinë dhe institucionet. Por nga ana tjetër, duket se brenda vetes Thaçi po e shijon këtë krizë të Veselit. Gjithsesi kjo është punë për ta”.
