Kandidati për kryeministër nga Lëvizja Vetëvendosje, Albin Kurti ka vizituar ditën e sotme vendet që janë prekur më së shumti nga tërmeti i të martës.
Përmes një postimi në “Facebook”, Kurti shkruan që Shqipëria nuk ishte gjunjëzuar, pavarësisht trishtimit dhe lotëve transparent.
Po ashtu, ai theksoi se forcimi i ushtrive të Shqipërisë e Kosovës do të duhet të ishte prioritet për qeveritë, sepse kjo do të ndihmonte në përballimin e situatave të tilla.
“E megjithatë, Shqipëria që vizituam në mëngjesin e sotëm, edhe pse nuk e fshihte trishtimin e lotët, nuk ishte e gjunjëzuar. Populli i Shqipërisë e ai i Kosovës, si dhe shqiptarët e Maqedonisë, Malit të Zi, Luginës e diasporës të gjithë janë bërë bashkë për t’ua lehtësuar dhimbjen familjarëve të atyre që fatkeqësisht kanë humbur jetën prej tërmetit, por edhe atyre qindra personave të lënduar e të traumatizuar, e shumë të tjerëve që janë dëmtuar ekonomikisht, një pjesë e mirë duke mbetur edhe të pastrehë”, ka shkruar Kurti mes të tjerash.
