Themeluesi i lëvizjes Vetëvendosje dhe njëherësh një nga kandidatët për kryeministër, Albin Kurti ka folur për mediet serbe, lidhur me formimin e qeverisë së re të Republikës së Kosovës, dialogun me Serbinë, dhe formimin e Forcave të Armatosura të Kosovës.
Kurti në një intervistë për gazetën serbe Blic, ka thënë se Kosova duhet të ketë një ushtri prej 20 mijë pjesëtarësh, pasi sipas tij, rreth një për qind e popullsisë duhet të jetë e përfshirë në ushtri, raporton metro.net.
Lidhur me dialogun me Serbinë, Kurti ka thënë se nëse ai merr drejtimin e qeverisë së Kosovës, ka një plan ekonomik dhe social për komunat veriore të vendit, të banuara me shumicë serbe. “Ne nuk jemi kundër serbëve, por Serbia është kundër nesh”, ka thënë Kurti.
Për qeverinë e re të Kosovës, Kurti ka thënë se nuk mund të ketë qeveri të re, me regjim të vjetër, duke aluduar këtu në koalicionin e PDK’së me AAK’në dhe Nisma’n, të cilët kanë fituar të drejtën për formimin e qeverisë, pasi kanë dal si grupacioni më i votuar në zgjedhjet e 11 qershorit.
Kurti ka thënë se ai si kandidat për kryeministër do t’i ndërmarr të gjitha masat e nevojshme për të filluar dhe për të udhëhequr bisedimet për të formuar një qeveri të re.
