Pas publikimit të një fotoje pranë zyrave të televizionit italian “Rai”, koreografi Albi Nako ngriti dyshimet se ai po afrohej pranë ish-bashkëshortes së tij, Klaudia Pepa. Ajo menjëherë i komentoi, duke aluduar se mes tyre mund të lindte diçka e re.
Albi Nako ka konfirmuar për “Revista Class”se ai nuk ka ndërmend që të shkëputet nga “Klan”-i, aty ku ka kaluar një pjesë të madhe të karrierës së tij. Referuar “Rai”-t, ai thotë se është 80% afër realizmit të një projekti të madh.
“Njeriu është i lirë që të bëjë zgjedhje në jetë dhe të mos qëndrojë në një vend. Jam në një tentativë projekti brenda “Rai”-t, që ka lidhje me baletin, sigurisht. Nuk jam shkëputur nga televizioni “Klan”, sepse unë aty kalova 20 vite të karrierës dhe arritjeve të mia profesionale. Për sa kohë do të ketë projekte të reja, unë jam i gatshëm të bashkëpunoj.
Sa i takon “Rai”-t, jam 80% afër realizmit të këtij projekti të madh”, tha Nako, ndërsa mohoi që projekti dhe angazhimi i tij në Itali të ketë lidhje me balerinën Klaudia Pepa, ish-bashkëshorten e tij e cila ka tashmë një karrierë të suksesshme në shtetin fqinj.
“Janë të gjitha spekulime. Nuk do të jem afër me Klaudian, edhe pse projekti im i ri ka lidhje me baletin”, përfundon ai.
