Ekonomisti Dritan Shano ka bërë një analizë të buxhetit 2018, një ditë pas mbledhjes së Këshillit Ekonomik Kombëtar nga kryeministri Edi Rama.
I ftuar në rubrikën “Opinion” të News 24, Shano tha se në buxhetin e këtij viti do të ketë investim të infrastrukturës rrugore për përfundimin e investimeve të tërhequra zvarrë prej katër vitesh.
Sipas tij, investimi 1 mln euro në ekonomi do ta çojë borxhin në 90%, për rrjedhojë do fillojmë t’i ngjajmë frikshëm Greqisë.
Taksa e pronës, sipas ekonomistit, do i rëndojë shumë xhepit të shqiptarëve.
“Në buxhet thuhet se do ketë investim të infrastrukturës rrugore, për ato investime të tërhequra zvarrë prej katër vitesh, se kështu po ndihmohet ekonomia. 42% rritje është mjaftueshëm dhe është për t’u përshëndetur, por njerëzit duan paratë në xhepin e tyre. Borxhi publik në Shqipëri është mbi 80%. Kjo qeveri ka detyrime të prapambetura. Ne fillojmë t’i ngjajmë frikshëm Greqisë. Investimi 1 mln euro në ekonomi, e çon borxhin në 90%.
Sistemi i taksave është indiferent për biznesin. Shqipëria ka një boshllëk që duhet ta mbushi, ne jemi vend me taksa të larta. Ne duhet të afrohemi tek taksa e sheshtë, duhet të reduktojmë barrën e sistemit të taksave që të jemi më mirë se Maqedonia dhe Mali i Zi. Duhet të bëhemi konkurrues me rajonin.
Me tërheqjen e përjashtimit të biznesit të vogël nga sistemi i TVSH-së. Krimi më i madh i xhepave tona është taksa e pronës”, tha Shano.
