Avokati i Viktor Markut, i akuzuar për vrasjen e biznesmenit Hekuran Billa, tha se ai nuk ka lidhje me ngjarjen. Në një prononcim për mediat, ai e konsideroi të paligjshëm arrestimin, duke argumentuar se nuk është konstatuar asnjë urdhër-ndalimi.
Mes të tjerash u shpreh se të dy, dajë e nip, Viktor Marku dhe Sebastian Mali, nuk kanë lidhje me ngjarjen, ndërsa theksoi se ky i fundit është një student i shkëlqyer i Juridikut.
“Janë disa shkelje në ndalimin e klientit tim. Janë procedura që i di mirë Policia Gjyqësore. Në relatimin që u bë, nuk konstatohet një urdhër-ndalimi.
Kodi parashikon që të ketë urdhër-ndalimi, dhe kjo nuk u konstatua. Kjo ishte A-ja! Janë nip e dajë, nuk kanë lidhje me ngjarjen, policia të gjejë autorët.
Sebastian Mali është student i Juridikut, student i shkëlqyer. Ai ka të drejtë që të lëvizje rrugicave, ka shkuar që të blejë gjëra personale”, pohoi avokati.
Seanca e dhënies së masës së sigurisë ndaj të arrestuarit Viktor Marku është shtyrë për nesër. “Policia të gjejë autorët. Ditën e vrasjes e deri kur më arrestuan kam qenë në Mal të Zi. Policia të bëjë ç’të dojë, unë nuk kam vrarë njeri”, ka thënë Marku.
