Radio e BBC-së ka ndërprerë transmetimin e këngëve të Michael Jackson pas dokumentarit tronditës që shfaq abuzimet seksuale të yllit të muzikës ndaj dy të miturve. Dokumentari i regjisorit Dan Reed që mbështet akuzat fokusohet në dëshminë e Wade Robson, aktualisht 36 vjeç dhe James Safechuck, 41 vjeç, të cilët pohojnë se Jackson abuzoi seksualisht me ta kur ishin fëmijë.
Raportohet se vendimi për të mos transmetuar këngët e tij është marrë gjatë javës së kaluar, pas shfaqjes së dokumentarit, dhe se hera e fundit që një këngë solo e Jackson u transmetua në stacion ishte më 23 shkurt.
“Ne e vlerësojmë çdo pjesë të muzikës së tij dhe i njohim meritat, por vendimet për atë që transmetojmë në rrjete të ndryshme gjithmonë bëhen duke pasur parasysh kontekstin dhe audiencat në mendje”, shprehet BBC.
“Leaving Neverland” është një dokumentar katër orësh dhe i ndarë në dy pjesë ku James Safechuck dhe Wade Robson rrëfejnë eksperiencat e tyre të abuzimit nga Jackson.
Kujtojmë se akuzat për marrëdhënie homoseksuale me të mitur ndaj yllit të popit qarkullojnë prej disa vitesh, dhe nisën fillimisht nga akuzat e një ish-fqinji të Jackson. Ndërsa akuzat u përforcuan edhe nga shërbyesja në shtëpinë e Jackson, e është shprehur se ka parë tmerr dhe se është kërcënuar që të mos flasë.
Ana e errët e Michael Jackson, ish-shërbyesja rrëfen tmerret e kështjellës Neverland
