Soros (Fondacioni Shoqëria e Hapur për Shqipërinë) ka reaguar në lidhje me akuzat e bëra nga organizata Judicial Watch, që thotë se Departamentin e Shtetit se kanë ndihmuar me fonde organizatat e George Soros, për aktivitetet politike në mbështetje të forcave të majta në Shqipëri.
“Siç është bërë e qartë në dokumentet e vëna në dispozicion nga Departamenti i Shtetit, Fondacioni Shoqëria e Hapur për Shqipërinë nuk ka përfituar as dhe njëherë financime si nga programet e zyrës së USAID në Shqipëri, po ashtu dhe nga Ambasada e Shteteve të Bashkuara në Tiranë”, theksohet në një deklaratë.
Po ashtu thuhet se Fondacioni Shoqëria e Hapur për Shqipërinë ka mbështetur vetëm me fondet e veta ekspertët e pavarur të angazhuar në kuadër të procesit të hartimit të reformës në drejtësi në mbështetje të Komisionit Ad Hoc Parlamentar duke dhënë kontributin e vet në forcimin e pavarësisë së sistemit të drejtësisë.
“Ky ka qenë dhe mbetet një proces, ku qeveria e Shteteve te Bashkuara ka kontribuar më vete, përkrah shumë partnerëve ndërkombëtarë. Fondacioni do të vazhdojë të bashkëpunojë me të gjithë aktorët politike dhe të shoqërisë civile në Shqipëri, për të informuar publikun dhe ndërtuar konsensusin e nevojshëm për forcimin dhe mbrojtjen e shtetit të së drejtës si dhe për të siguruar vendimmarrjen e pavarur dhe të paanshme të gjyqtarëve nga ndërhyrjet politike”.
Akuza e Judicial Watch
“Judicial Watch”, një organizatë konservatore, e cila vëzhgon abuzimet e mundshme të buxhetit federal në Shtetet e Bashkuara, i bazon akuzat mbi dokumentet e brendshme të Departamentit të Shtetit të siguruara përmes së drejtës së informimit.
“Judicial Watch” thotë se fonde prej rreth 9 milionë dollarësh të Agjencisë së Shteteve të Bashkuara për Zhvillimin Ndërkombëtar (USAID) i janë kaluar fondacionit Soros në Shqipëri gjatë vitit 2016, që sipas “Judicial Watch”, synonin t’i jepnin qeverisë socialiste kontroll më të madh mbi sistemin e drejtësisë përmes reformës në drejtësi.
“Judicial Watch” akuzon ambasadorin Donald Lu si të lidhur ngushtë me Sorosin dhe me qeverinë socialiste në Shqipëri.
