Deputeti Myslim Murrizi, është paraqitur në SPAK, ku ka depozituar një kallëzim për tenderin e uniformave që është kryer në Ministrinë e Brendshme.
Gjatë të mërkurës së kaluar, Murrizi e paralajmëroi këtë padi në Kuvend, ku u përplas dhe me ministrin Lleshaj, për atë që sipas tij fle gjumë ndërkohë që poshtë hundës së tij kalojnë akte korrupsioni.
Sipas deputetit, tenderi i uniformave i është dhënë një kompanie, e cila është regjistruar në Qendrën Kombëtare të Biznesit për pastrim dherash dhe shkëmbime tregtare dhe se nuk ka lidhje aspak me objektin e tenderit. Murrizi shton më tej, se kjo kompani është e preferuar e të gjitha qeverive.
“Në datë 14 korrik, Ministria e Brendshme ka bërë një tender 23 milion euro për uniformat, tender i nisur para një viti, i ngecur në ingranazhet e korrupsionit. Kompania turke ofroi 4.2 mln euro më pak dhe shpallet fituese kompaninë DE e cila ka në objektin e saj sipas regjistrimit në QKB, gërmime dheu dhe shkëmbime tregtare. E ulët 30% kategorinë e artikujve që ofron dhe nuk keni ulur asnjë qindarkë nga çmimi. Kjo kompani çuditërisht është e preferuara e të gjitha qeverive”, tha Murrizi.
