Ditën e sotme u nda nga jeta mjeshtri i madh i humorit Gëzim Kruja.
Mikesha e tij, njëkohësisht aktore e njohur shqiptare, Drande Xhaj, është përlotur teksa tha pengun e madh të aktorit.
Për “Report TV” ajo pohoi se Kruja dëshironte që në 80-vjetorin e lindjes së tij të mbante një premierë të re, por nuk ia doli dot.
“Me keqardhje para një ore pushoi së rrahuri zemra e mjeshtrit të humorit Gëzim Kruja.
Ky është një lajm i trishtë, kontributi dhe karriera e tij ka qenë e shpërndarë në të gjitha viset dhe vendet ku ka shqiptarë. E mora këtë lajm të trishtë me shumë keqardhje. Ai ka qenë një njeri i mrekullueshëm dhe një mësues për mua.
Prej disa vitesh vuante nga një sëmundje e rëndë. Hera e fundit që u takuam ishte 80-vjetori, në atë gjendje, por më mirë, se e kemi si kujtim atë ditë.
Fatkeqësisht nuk e kaloi këtë sëmundje. Gëzim Kruja do të mbetet në historinë e humorit shqiptar dhe do të jetë një nga artistët më të dashur të humorit në Shqipëri.
Është e vërtetë që në portretin e tij dukej se kishte pengje, një ishte festimi i 80-vjetorit me një premierë të re, me materiale të reja. Dhe iku me këtë peng, por ai ka materiale të jashtëzakonshme që do të mbështesin në historinë e humorit shqiptar”, tha ajo.
