Aktori Florian Binaj, i spikatur për humorin dhe shumë i dashur për publikun, ishte i ftuar në emisionin më të dashur për fëmijët “Në Kurthin e Piter Pan”, në “Tv Klan”. Binaj duhet t’i përgjigjet pyetjeve pikante që fëmijët i bëjnë, ndoshta edhe për ta vënë pak në siklet aktorin, ose për të mësuar ndonjë të pathënë nga jeta personale.
Ai ka treguar në emision se kishte për të festuar përvjetorin e 15-të të lidhjes me bashkëshorten, por vetëm për të qenë i pranishëm në emision, e ka lënë atë të presë. Të quajtur “gazetarë të vegjël”, fëmijët e kanë pyetur se si reagon ndaj policisë kur merr gjoba.
Ti ke shumë vite që bën rolin e policit tek “Portokallia”. Si i ke marrëdhëniet me policinë, merr shumë gjoba?
“Këto vitet e fundit i kam shumë të mira marrëdhëniet, po më përpara policia më kishte shumë inat”. I njohur jo vetëm për rolin e policit, por edhe për imitimin e shumë personazheve politikë, ka bërë që fëmijët t’i drejtojnë pyetje edhe për ata.
Kush e ka kokën më të madhe, ti apo kryeministri?
“Kokën më të madhe e ka ai që ka bërë këtë pyetjen”, u përgjigj Binaj.
A jeni xheloz? “Patjetër që jam xheloz, sepse të gjithë kemi xhelozi, disa e shfaqin disa jo, por unë kam xhelozi të shëndetshme. Pa xhelozi nuk ka dashuri”, shprehet aktori. Gjatë emisionit, Florian Binaj ka treguar se i pëlqejnë shumë fëmijët, dhe dëshira e tij është të ketë pesë fëmijë. “Vdes të kem shumë fëmijë, 2 i kam dhe dua të kem dhe 3 të tjerë, dua të kem 5 fëmijë…”, tha Binaj.
