Gjykata e Tiranës ka dhënë masën e dënimit për dy shoferët e përfshirë në aksidentin tragjik në zonën e Porcelanit, ku mbetën të vdekur dy kalimtarë.
Gjatë seancës së mbajtur ditën e sotme, gjykata vendosi “arrest në burg me afat 30 ditor” për shtetasin Edmond Murati dhe “arrest në burg pa afat” për shoferin e automjetit tjetër që u fut me shpejtësi në parakalim, Etjon Lazrin.
Avokati i Muratit e ka cilësuar si të padrejtë masën për klientin e tij. Sipas tij, nga pamjet e siguruara nga kamerat duket qartë se kush e ka fajin. Ai shton se klienti i tij ka qenë në rregull me rregullat e qarkullimit, pasi ka hapur sinjalin për kalim në korsinë tjetër, në momentin kur u përplas nga automjeti qe drejtohej nga shoferi Lazri.
“Ne kemi shprehur mënyrën dhe mekanizimin tonë lidhur me ngjarjen si ndodhi. Doja që të shprehja ngushëllimet familjarëve të personave që humbën jetën, nuk është ngjarje që do të ndihej i kënaqur askush kur përfaqëson klientin në gjyq, por e vërteta është se klienti im ishte në korsinë dhe drejtimin e rregullt, e pasi ka hapur sinjalin për të kaluar në korsinë majtas është përplasur nga mjeti volksvagen. Nuk jem dakord me vendimin e gjykatës, nuk janë kriteret për të caktuar masë me afat 30 ditor. Në video është e përcaktuar qartë fajësia”, tha ai pas seancës.
Nga aksidenti humbën jetën Erion Balla, 36 vjeç nga Rrësheni dhe 72-vjeçarja Idajete Salliu.
