Instituti i Statistikave ka publikuar raportin “Aksidentet rrugore” për muajin tetor 2017.
Ajo që vihet re është ulja e numrit të aksidenteve në muajin tetor 2017, krahasuarin me të njëjtin muaj të një viti më parë, megjithatë duhet thënë se ulja nuk është në shifrat të konsiderueshme.
Së fundmi, kemi parë shpesh njoftime të Policisë së Shtetit lidhur me shtrëngimin e masave për rritjen e parametrave të sigurisë rrugore, por duket se këto masa kanë dhënë një efekt të vogël, teksa numri i aksidenteve në tetor 2016 është ulur me 4,7% krahasuar me tetorin 2017.
Një tjetër shifër interesante është fakti se numri më i lartë i aksidenteve është kryer nga grup-mosha 25-35 vjeç, të cilët zënë 27,7% të numrit të aksidenteve.
Kjo mund të vijë nga dy arsye: praktika e pakët e shoferëve që sapo mund të kenë marrë në zotërim një automjet, apo nga pakujdesia drejtuesve të rinj.
Por, cilat janë qytetet që mbajnë stafetën për numrin më të lartë të aksidenteve dhe cilat qytete shënojnë numrin më të ulët të aksidenteve?
Sipas të dhënave të publikuara nga INSTAT, rezulton se qyteti më numrin më të lartë të aksidenteve, siç merret me mend, është pikërisht Tirana.
Kështu, në dhjetë mujorin e parë të vitit janë shënuar 647 aksidente në kryeqytet, ku për pasojë kanë humbur jetën 41 persona.
Pas Tiranës, Durrësi është qyteti që ka shënuar 222 aksidenti nga janari deri në tetor 2017, me 22 të vdekur.
Numër të lartë të viktimave janë shënuar edhe në Fier e Lezhë, ku në fakt numri i aksidenteve rezulton më i ulët se në Durrës.
Konkretisht, edhe pse në Fier janë shënuar 101 aksidente, numri i viktimave është 1/4, pra 25.
Ndërkohë, në Lezhë rezulton se gjatë 10-mujorit të parë të vitit janë shënuar 182 aksidente dhe ka pasur 22 viktima.
Por, cilat janë qytetet me numrin më të ulët të aksidenteve?
Për sa i përket muajit tetor, rekord mban Berati me vetëm 2 aksidente.
Numri më i ulët i aksidenteve për 10 mujorin e parë të vitit shënohet në Gjirokastër, 31, ndërsa numri më i ulët i të vdekurve nga aksidentet për 10-mujorin e këtij viti është shënuar në Berat dhe Dibër, konkretisht me nga një viktimë.
Interesant është fakti që në Gjirokastër, edhe pse janë shënuar vetëm 31 aksidente në 10 muaj, janë shënuar 11 viktima. TIRANA TODAY
