20 persona kanë humbur jetën në një aksident rrugor në Pakistan, pasi një autobus u përplas me një cisternë nafte në Pakistanin jugor. Aksidenti ndodhi në orët e para të së martës, në një autostradë në provincën Punjab kur autobusi u përplas me cisternën nga pas, thanë zyrtarët.
Autobusi, me 24 pasagjerë dhe dy anëtarë të ekuipazhit, ishte nisur për në Karaçi nga Lahore. Policia tha se shoferi i cisternës së naftës u largua nga vendi i ngjarjes.
Disa prej trupave ishin djegur keq dhe vështirë për t’u identifikuar, thanë autoritetet, duke shtuar se ata do të nisin një proces testimi të ADN-së për ta bërë këtë. Gjashtë të mbijetuar u plagosën rëndë në tragjedi, dhe u transferuan në spitalin Nishtar të qytetit Multan, thanë zyrtarët.
Oficeri hetues Kashif Shahzad tha se një raport i parë informacioni (FIR) u regjistrua nga policia në lidhje me aksidentin.
“Është shumë e mundshme një rast i drejtimit të pakujdesshëm nga shoferi i autobusit, i cili gjithashtu ka vdekur”, i tha ai Al Jazeera.
Asad Shabbir, zëdhënës i Policisë Kombëtare të Autostradave, tha se cisterna po transportonte mijëra litra naftë.
“Zjarri pas përplasjes ishte masiv, gjë që e bëri të vështirë për punonjësit e shpëtimit nxjerrjen e të vdekurve dhe të plagosurve,” tha ai.
Aksidenti ka sjellë mbylljen e përkohshme të autostradës. Kryeministri i Pakistanit Shehbaz Sharif shprehu ngushëllimet e tij në Twitter. “Të pikëlluar nga humbja e 20 jetëve të çmuara në aksident. Lutjet e mia janë me familjet e viktimave”, ka shkruar ai.
Kryeministri i provincës Punjab Parvez Elahi gjithashtu shprehu pikëllimin dhe u kërkoi zyrtarëve që t’u japin mbështetje të plotë familjeve.
Aksidentet rrugore fatale janë të zakonshme në Pakistan, ku shumë fajësojnë infrastrukturën e dobët, automjetet e papërshtatshme dhe paaftësinë e njerëzve për të ndjekur rregullat e trafikut.
Të dhënat e përpiluara nga Byroja e Statistikave të Pakistanit, tregojnë se vetëm në vitin 2021 ka pasur 10.379 aksidente rrugore që rezultuan në 4.566 vdekje.
Burimi i lajmit: aljazeera. Përshtatur nga Tirana Today
