Një aksident i rëndë automobilistik është regjistruar mbrëmjen e sotme në aksin Shkodër-Koplik, ku një punonjës policie ka përplasur për vdekje një person.
Mësohet se efektivi Gjergj Gjeloshi, duke drejtuar automjetin tip ”Fiat”, ka përplasur një 50-vjeçar i cili po lëvizte me biçikletë.
Aksidenti ndodhi në afërsi të fshatit Shtoj i Ri, ndërsa viktimë mësohet se ka mbetur, Agim Shkambaj.
Ky i fundit u dërgua fillimisht në Spitalin Rajonal të Shkodrës, por fatkeqësisht nuk ka mundur t’i mbijetojë plagëve të marra.
”Më datë 29.01.2021, rreth orës 17:30, në aksin rrugor Koplik – Shkodër, në fshatin Shtoj i Ri, Shkodër, automjeti tip “Fiat” që drejtohej nga shtetasi Gj. Gj. 26 vjeç, ka goditur shtetasin A. Sh. 49 vjeç, i cili lëvizte me biçikletë. Shtetasi A.Sh është dërguar në Spitalin Rajonal Shkodër dhe me pas ka ndërruar jetë si pasojë e plagëve të marra.”, informon policia
Policia mbërriti në vendngjarje dhe ka arrestuar menjëherë efektivin i cili shkaktoi aksidentin.
Veprimet po kryhen me grup hetimor nën drejtimin e Prokurorisë së Rrethit Gjyqësor Shkodër, për sqarimin e rrethanave të aksidentit.
