Një aksident me pasojë dy të plagosur ka ndodhur sot gjatë mesditës në aksin rrugor Shkodër-Lezhë. Një shtetas 31-vjeçar i cili po udhëtonte me një motorr, është përplasur me një makinë.
Për pasojë, ai dhe personi në të cilën udhëtonte, kanë pësuar lëndime. Ata menjëherë janë transportuar për në spital, e ndërsa tashmë ndodhen nën kujdesin e bluzave të bardha. Nga ana e policisë, po kryhen të gjitha hetimet për të hedhur dritë mbi këtë aksident, fatmirësisht pa pasoja për jetën.
“Me datë 22.07.2019, ora 13:35, në aksin rrugor Shkodër-Lezhë, fshati Beltojë, Shkodër, mjeti motor tip Yamaha, drejtuar nga shtetasi M. S. 31 vjeç, banues në fshatin Mabë, Lezhë, është përplasur me mjetin tip Renault, që drejtohej nga shtetasi N. Gj. 27 vjeç, banues në fshatin Berdicë, dhe gjatë rrëzimit të motorit ka aksidentuar biçiklistin shtetasin D. Gj. 32 vjeç, banues në lagjen Skenderbeg, Shkodër, i cili bashkë me drejtuesin e motorit u dërguan në Spitalin Rajonal Shkodër, dhe ndodhen nën kujdesin e mjekëve.
Po kryhen veprimet me grup hetimor për sqarimin e rrethanave të aksidentit”.
