Rektori i Universitetit “Luarasi”, Et’hem Ruka, është nderuar me titullin “Nderi i Akademisë” nga Akademia e Shkencave. Me anë të ceremonie ku merrnin pjesë personalitete të Akademisë dhe Shkencave dhe të Kulturës, kreu i Akademisë së Shkencave, Skënder Gjinushi, i dorëzoi titullin e lartë akademikut Ruka.
“Z. Et’hem Ruka i jepet titulli “Nderi i Akademisë” me motivacionin për veprimtarinë e tij të suksesshme në fushën e biologjisë, kimisë me kontribute të mirënjohura, në arsim dhe shkencë.
I vlerësuar si një ndër specialistët kryesor të fiziologjisë së botës së gjallë, me një rol të spikatur si pedagog dhe botimin e qindra artikujve kërkimore e përshtatjen e librave dhe dhjetra shkrimeve popullarizuese, veprimtar me stimë dhe nderim”, tha Gjiknuri.
Në këtë ceremoni nuk mund të mungonte dhe fjala e profesor Et’hem Rukës, i cili tha se ishte i nderuar me këtë titull.
“Ndihem i nderuar që në 50-vjetorin e krijimit të Akademisë, më jepet një vlerësim kaq i lartë. Karrierën time akademike e kam filluar në të njëjtin vit me themelimin e Akademisë në vitin 1972. Jam pjesë e një trupe që kanë nxjerrë personalitete të shquara që kanë kontribute të spikatura në shkencë dhe arsim, e pse jo edhe në zhvillimet demokratike të vendit. Do të përmendja që kemi nxjerrë një President të nderuar siç është Rexhep Mejdani.
Në Fakultetin e Shkencave të Natyrës kanë dalë më shumë se 13 akademikë. Ky është një fakultet që i ka dhënë vendit, 1 zëvendëskryeministër, 2 kryetarë të Kuvendit, 4 ministra të Arsimit, i ka dhënë Parlamentit shqiptar shumë parlamentarë të nderuar. Përshëndes mirënjohjen për 50- vjetorin e themelimit të Akademisë dhe i uroj suksese në sfidat që ka përpara”, pohoi ai.