Jeta e Enver Hoxhës është e mbushur plot me mistere, dhe kontradikta. Edhe pse ishte një ndër njerëzit më të lexuar, ai ngriti një nga diktaturat më brutale në Shqipëri.
Në dokumentarin në fjalë, do përballeni me të dhëna dhe fakte tronditëse, lidhur me historinë e shkencëtares së parë shqiptare, Sabiha Kasimati. Ajo u konsiderua kundërshtare e sistemit komunist.
Sabiha Kasimati ishte laureuar në Torino të Italisë për biologji, dhe ishte një nga anëtarët më të hershëm të Institutit të Shkencave, pararendës i Akademisë së Shkencave.
Në dokumentarin publikuar në“abcnews”, përcillen fakte të pakundërshtueshme. Sabiha Kasimati, në rininë e saj kishte refuzuar dashurinë e Enver Hoxhës. E më të ardhur në pushtet, ai mori hak, duke i futur emrin në “kryq”.
Më 19 shkurt 1951, ndodhi një shpërthim në Ambasadën e ish-Bashkimit Sovjetik në Tiranë. Nga sulmi nuk kishte asnjë të plagosur. Autoritetet shqiptare të asaj kohe, si fajtorë i konsideronin një grup prej 22 intelektualësh të rinj, që punonin asokohe në Tiranë, duke përfshirë edhe Sabiha Kasimatin (si e vetmja grua). Pavarësisht nga mungesa e çdo prove të fajit, Sabihaja u arrestua nga Sigurimi më 20 shkurt 1951.
Në 26 shkurt, Sabiha Kasimati dhe 21 të tjerë u pushkatuan pa u hetuar, dhe pa u gjykuar. Ky cilësohet si një nga krimet më monstruoze të komunizmit shqiptar.