Kreu i Bashkimit Demokratik për Integrim, Ali Ahmeti ka qëndruar në komunat e rajonit të Pollogut, në Zhelinë, Vrapçisht e Gostivar për të mbështetur kandidatët e BDI-së në balotazhin e së dielës.
Për sa i përket çështjes së emrit, Ahmeti foli me optimizëm teksa tha se pas zgjedhjeve lokale Maqedonia dhe Greqia do t’ia dalin të zgjidhin ngërçin lidhur me emrin, gjë që sipas tij do të përshpejtojë integrimin euro-atlantik të vendit.
Po ashtu, gjatë fjalës së tij teksa qëndronte me simpatozantë të kësaj force politike në fshatin Negotinë, Ahmeti komentoi bashkimin e partive Aleanca për Shqiptarët dhe Lëvizjes Besa.
Ahmeti tha se shqiptarëve nuk iu duhen 10 parti, por mjaftojnë vetëm dy që të korrigjojnë njëra-tjetrën:
“Me shumë kujdes i dëgjoj partitë e tjera. Unë nuk dua të bëj armiq! Vërtet, dua që skena politike ndër shqiptare të forcohet, të stabilizohet, sepse kur ke parti politike të organizuara mirë, të profilizuara, është dobi për njerëzit, po të thuash të pavërteta, lajme të rrejshme gjithë ditën dhe të mendosh që fiton, kjo nuk është në rregull. Nuk jam për këtë, ama shqiptarëve nuk iu duhen dhjetë parti. Mjaftojnë vetëm dy që të korrigjojnë njëra–tjetrën. Kush është më i zoti, kush ka program më të mirë, le të fitojë e tjetra ta korrigjojë.”
