Shkrimtari, publicisti, pedagogu Agron Tufa ka risjellë edhe njëherë në vëmendje “spiunin me inicialet I.M”, duke i dalë në mbrojtje kryetarit të Partisë së Lirisë, Ilir Meta. Ai e cilëson ligjin e miratuar në Kuvend për hapjen e dosjeve, propagandë të qeverisë. Në një intervistë për “Euronews Albania”, Agron Tufa u shpreh se gjithçka nisi nga një e-mail anonim, me qëllimin e vetëm për të goditur kreun e Partisë së Lirisë, Ilir Meta.
Tufa tha se prej kohësh ka denoncuar me emra dhe mbiemra mbi bazën e dokumenteve origjinale edhe njerëz të njohur në politikës, por nuk u morën parasysh nga Autoriteti i Dosjeve.
Sipas tij, e gjithë skema u bë për të goditur Metën për interesa politike, ndërkohë që I.M për të cilin përflitet, sipas tij, është një person nga Librazhdi që vetëm emrin ka të përbashkët me ish-Presidentin.
“Personi që vazhdon të mbahet ende në gojë, është një emër tjetër homonim dhe është nga Librazhdi.
Për këtë kam burime të tjera. Turpi i votimit të këtij ligji është se po bëhet një lojë. Ky ligj i mbyll hermetikisht dosjet, ngre një çështje njerëzore për ndërgjegjen qytetare: pse kufizohen vetëm tek bashkëpunëtorët, po për oficerë e Sigurimit të Shtetit që sot drejtojnë institucione të shoqërisë”, tha Tufa.
