Mesut Ozil ka dhënë dorëheqjen nga kombëtarja e Gjermanisë, duke akuzuar drejtuesit për një sjellje raciste ndaj tij dhe se kërkonin ta bënin atë kokë turku pas dështimit në Botëror. Ky largim u kthye në ngjarjen e ditës në Gjermani, pasi u komentua gjatë nga drejtuesit e Federatës dhe nga njerëz me pushtet politik. Ai që ka reaguar më ashpër është presidenti i Bayern Munich, Uli Hoeness. Ky i fundit u shpreh se: “Ozil ka 4 vite që luan si një m*t”.
Por reagimi ka qenë i menjëhershëm nga agjenti i Mesut Ozil, Erkut Sogu. Ai i është përgjigjur ashpër Hoenessit duke e akuzuar për vjedhje fondesh dhe e ka cilësuar si turpin e një ekipi të madh si Bayern Munich. “Zotëri Hoeness, ne nuk do të humbasim më shumë kohë apo energji duke folur për një temë rreth të cilës ti natyrisht nuk di asgjë. Jo vetëm që jeni turpi i vetvetes, por më e rëndësishmja jeni turpi i Bayern Munichut dhe popullit gjerman”.
Reagimi i plotë i agjentit:
“Komentet e zotit Hoeness janë pa lidhje fare. Përpiqet që të largojë vëmendjen nga problemi i racizmit dhe i diskriminimit në Gjermani, dhe nuk mund të japë deklarata idiote, që janë totalisht të ekzagjeruara. Si president i Bayernit duhet të flasë për ata tetë lojtarë që ishin me kombëtaren në Rusi duke përfaqësuar Gjermaninë dhe jo të merret me Mesutin…
Nëse ai është kaq i keq, atëherë pse nuk pyesni Joahim Low, Arsen Wenger dhe Joze Murinho? Është qesharake që ai nuk merr parasysh opinionin e tre specialistëve dhe trajnerëve të mëdhenj. Zoti Hoeness, nuk do të shpenzojmë më kohë dhe energji për të folur për këtë argument. Atë që ne dimë për ju është se keni bërë evazion fiskal prej 28,5 mln eurosh dhe për këtë arsye u larguat nga Bavaria, por u dënuat për sjellje kriminale.
Duke bërë krim, vodhët para, para që i takonin shkollave, fëmijëve dhe spitaleve. Ato shkuan në xhepin tuaj. Hoeness dhe shumë persona të tjerë në Gjermani kanë frikë të përballen me argumente si ai që preku Ozil, mbi racizmin dhe fenë… Ata nuk dua të shohin të vërtetën”.
