Presidenti Meta ka vlerësuar me “Dekoratën e Artë të Shqiponjës” ekipin e Njësisë së Shpëtimit Kombëtar të Forcave të Mbrojtjes së Izraelit. Gjatë vizitës që po zhvillon në Izrael, Meta vizitoi bazën ushtarake të Ramlës, pjesë e Forcave izraelite të Mbrojtjes. Ai u takua me personelin ushtarak, një pjesë e të cilit dha kontribut të veçantë për tejkalimin e pasojave të rënda që la pas tërmeti tragjik që goditi Shqipërinë më 26 nëntor 2019.
Nga fotot e shpërndara në faqen e Facebook-ut, vihet re fshehja e portretit të njërit prej ushtarakëve. Gazetarët kanë pyetur Presidencën mbi arsyen se pse ka zgjedhur të mbulojë fytyrën e ushtarakut, por një përgjigje ende nuk ka ardhur.
Cilat janë dyshimet e ngritura në lidhje me këtë rast? Dyshimet e para janë se ushtaraku në fjalë mund të jetë agjent sekret, mirëpo publikimi i fotove me fytyrën e tij mbuluar është lexuar si gafë. Presidenca ka publikuar këto imazhe, duke ngjallur shumë dyshime.
Statusi
“Në mirënjohje dhe vlerësim për punën e shkëlqyer në ndihmë të institucioneve tona dhe komuniteteve të prekura rëndë nga pasojat e tërmetit tragjik të 26 nëntorit, pata nderin të vlerësoja me “Dekoratën e Artë të Shqiponjës” ekipin e mrekullueshëm të Njësisë së Shpëtimit Kombëtar të Forcave të Mbrojtjes së Izraelit.
Me ndihmën e vyer, mësimet e vlefshme, humanizmin dhe solidaritetin e jashtëzakonshëm, ata i konsoliduan edhe më tej marrëdhëniet miqësore dhe historike mes dy popujve dhe vendeve tona”.