“Nuk do të lejoj shpifjet që shkaktojnë përçarje”, tha sot Kryetari ne detyre i Partisë Demokratike, Lulzim Basha, duke reaguar për deklaratën e ish-presidentit Bujar Nishani se ai e dinte për vendimin e Departamentit Amerikan të Shtetit për Sali Berishën. Nishani deklaroi dje pas një interviste se, “Basha e dinte më parë vendimin e DASH për Berishën, ndaj dhe afroi datën e zgjedhjeve. Në fakt, edhe kandidati për kryetar i kësaj partie, Fatbardh Kadilli, deklaroi në një intervistë të enjten në darkë, në “Syri TV” se, kishte patur dijeni lidhur me këtë vendim shumë kohë më parë se sa të bëhej publik. Madje, ai përmendi edhe Bashën, si një person që kishte dijeni.
Postimi i plotë i Bashës
E kam nisur fushatën për zgjedhjet brenda partisë me bindjen se nga kjo garë duhet të dalim me të fortë dhe më të bashkuar. Kam refuzuar reagimet që nxisin përçarje edhe pse çdo ditë ndaj meje janë hedhur sulme personale dhe politike të pavërteta dhe të padrejta. Por çdo gjë e ka një limit. Ndaj sot hedh poshtë me neveri shpifjen e ulët të Bujar Nishanit. Inati e mllefi personal e ka një limit. Por sot ai limit është kaluar, sepse lidhet me një çështje që ka prekur thellë jo një individ, jo Sali Berishën por gjithë partinë tonë. Këto shpifje të ulëta i shërbejnë vetëm atyre që bëjnë gjithçka të përçajnë Partinë Demokratike. Dhe unë këtë nuk do ta lejoj.
