Kreu i Partisë Demokratike, Lulzim Basha, në një takim të mbajtur gjatë mesditës me banorët e zonës së ish-Kinostudios në Tiranë, tha se është koha që qytetarët të fitojnë betejën e tyre.
Ai apeloi se protestat e përditshme, do të jenë për të shporrur bandat kriminale. Para mbështetësve, kryedemokrati Basha deklaroi se PD do ti japë program shprese shqiptarëve.
Basha ndër të tjera nënvizoi se afera korruptive e aksit rrugor Milot-Balldren tregon babëzinë dhe makutërinë e kësaj qeverie. Kreu i opozitës akuzoi oligarkët, të cilët sipas tij, po mbajnë gjallë Rilindjen.
“Gjithë taksat tuaja në 4 vite po i jep me një dorë për 17 km rrugë. Në ditët e fundit, në kohën kur Rilindja është në vdekje klinike, krimet korruptive të Edi Ramës po marrin përmasa të papara.
Imagjinoni që gjithçka paguhet në Tiranë, të mbledhura bashkë, jo në 1 vit por në 4 vite, të gjitha të dhëna me një dorë, me një garë false, si Unaza e Re, 290 milionë euro.
Ja ku na çon babëzia, kriminaliteti i një bande që vetëm qeveri nuk është. Pse? Se nuk erdhi si produkt i votës së lirë. E ka lidhur fatin me 6-7 oligarkë, me pronarë mediash, me një grup kriminelësh. Këta e mbajnë në këmbë organizatën kriminale të Rilindjes”, u shpreh Basha.
