Administrata shtetërore në nivel vendor ende nuk ka marrë pagat e muajit tetor. Megjithatë, në Ministrinë e Financave mohoet të ketë probleme me fondet. Sipas A2, Ministria e Financave ka pohuar se fondet për pagat për këtë vit janë të siguruara deri në fund të dhjetorit.
Madje, specialistët e dikasterit thonë që s’ka pasur as vonesa. Sipas tyre çdo institucion që dorëzon listë-pagesat e pagave dhe sigurimeve shoqërore i bëhet lëvrimi i fondeve direkt nga thesari.
Sipas tyre, vonesat mund të jenë shkaktuar nga vet institucionet. Shkak për ta është fakti që një pjesë e bashkive që rezultojnë debitore nuk i kanë dorëzuar njëkohësisht listë-pagesat për pagat dhe sigurimet. Këto institucione janë udhëzuar nga Ministria e Financave tashmë në mënyrë që të bëjnë zhbllokimin dhe lëvrimin e pagave.
