Kontrolli i Lartë i Shtetit kallëzon në Prokurori 11 zyrtarë dhe ish-zyrtarë në ishkomunat Blinisht, Ungrej dhe Zejmen, të Lezhës dhe 3 zyrtarë në Bashkinë Këlcyrë. Kallëzimet penale në ish-komunat e Bashkisë së Lezhës janë bërë pasi Kontrolli i Lartë i Shtetit konstatoi shkelje me tenderat me dëm ekonomik në vlerën e 24,3 milionë lekëve.
Audititi në këto ish-komuna i përket periudhës janar 2013-korrik 2015. Sipas KLSH, në ish-komunën Blinisht u gjetën shkelje në tenderin për “Rikonstruksionin i rrugës së shkollës Kallmet i madh (faza I)”, me fond limit 2,266,224 lekë, në ish-komunën Ungrej “Ndërtim ure auto 2HD, 10 m mbi përroin e Kalivaçit”, me fond limit 10,085,039 lekë.
Sipas KLSH-së, janë kryer veprime me dëm ekonomik të fondeve publike në Buxhetin e Shtetit, për vlerën 14,984,750 lekë, shkaktuar nga kualifikimi dhe shpallja fituese e kompanisë me ofertë më të lartë, në kushtet kur nuk ka plotësuar kriteret për kualifikim në tender.
Në ishkomunën Zejmen janë kryer shkelje me dëm ekonomik në vlerën 1,964,300 lekë, duke mos justifikuar me dokumentacion ligjor burimin e përdorimit të tyre. Për të gjitha këto shkelje, KLSH bëri kallëzim penal ndaj 11 zyrtarëve dhe ish-zyrtarëve, në ish-komunën Blinisht për 5 (pesë) zyrtarë dhe ish-zyrtarë; N. K. me detyrë ish-sekretar i Këshillit të Komunës, në cilësinë e kryetarit të KVO, S. L., me detyrë administrator, në cilësinë e anëtarit të KVO; F. M. me detyrë specialist në Zyrën e Taksave Vendore, në cilësinë e anëtarit të KVO; E.O. me detyrë ish- arkivist, në cilësinë e anëtarit të KVO; N. Ll. me detyrë specialist pyjesh në cilësinë e anëtarit të KVO. Në ish-komunën Ungrej, për 4 (katër) zyrtarë: Gj. Gj. me detyrë administrator, D. D., me detyrë ishpërgjegjës i Zyrës së Financës, në cilësinë e kryetarit të KVO; Gj. N. me detyrë nëpunës i Gjendjes Civile; Z. P. me detyrë ish-sekretar i Këshillit të Komunës, në cilësinë e anëtarit të KVO.
Në ish-komunën Zejmen për 2 (dy) ishzyrtarë: A. B. me detyrë ishkryetar i Komunës dhe V. B. me detyrë ish-përgjegjës i Zyrës së Financës. Shkelje me tenderat u gjetën edhe në Bashkinë Këlcyrë për periudhën janar 2016 deri në dhjetor 2017. Për abuzimet në 17 tendera, dëmi ekonomik llogaritet në vlerën e 37,3 milionë lekëve.
Për këto shkelje, Kontrolli i Lartë i Shtetit kallëzoi 3 zyrtarë të Bashkisë Këlcyrë, A. L., me detyrë specialist i Kadastrës, në cilësinë e kryetarit të Komisionit të Vlerësimit të Ofertave (KVO), R. H. me detyrë përgjegjëse e Zyrës së Taksave Vendore, në cilësinë e anëtarit të KVO dhe A. Q. me detyrë inspektor i Taksave Vendore./Panorama/
