Luftëtarët e ISIS tmerruan botën 5-6 vitet e fundit, me krimet e tmerrshme që kryenin dhe filmonin. Ata u bënë makthi i shumë njerëzve në Irak dhe Siri. Por edhe ata vetë, e kishin një makth. Ky ishte irakiani Abu Azrael, i njohur ndryshe si “Engjëlli i Vdekjes”, për vrasjen e më shumë se 1.500 luftëtarëve xhihadistë.
Komandanti i Kataib Al-Imam Ali, një grupim militantësh irakianë shiitë, u shndërrua në një hero në Irak. Azrael kishte një numër të madh ndjekësish në mediat sociale, për rezistencën që i bëri ISIS-it në Irak në vitin 2014. Në vitin 2015, ai ishte në titujt e faqeve ndërkombëtare të lajmeve në Angli, Francë dhe SHBA. Motoja e Abu Azrael është “Ella Tahin”, që do të thotë “të bluaj deri sa të bëj pluhur”.
Para luftës kundër ISIS, Abu ishte pjesëtar i milicisë së Muktad Al-Sadr që luftoi SHBA-në, gjatë pushtimit të Irakut. Mësohet se ai kishte përfunduar universitetin në degën e Edukimit Fizik, dhe ishte mjeshtër në artet marciale. Azrael jepte mësim në një universitet, dhe iu bashkua luftës kundër ISIS, kur xhihadistët ekzekutuan disa nga studentët e tij.
“Engjëlli i Vdekjes”, është kritikuar për videot makabre që ai realizonte, duke gjymtuar apo djegur trupat e pajetë të luftëtarëve të ISIS. Shteti Islamik pretendon se e ka vrarë, duke publikuar edhe pamje të tij, por shumë njerëz pretendojnë se e kanë parë atë gjallë. Cilado qoftë e vërteta, Abu Azrael, është shndërruar në një legjendë në vendin e tij./ Tirana Today
