Në tentativën për të kuptuar se cili ishte fakti më absurd i derivuar nga vrasja elektorale e Elbasanit, dje, ditën me diell, do të duhej të merrnim në shqyrtim disa fenomene një për një;
-Blerja e votave dhe për rrjedhojë e mandateve dhe zgjedhjeve
Fakti që blihen vota, bllokohen karta identiteti apo më keq akoma; blihen karta identiteti që komisionerët të votojnë në vend të qytetarëve është tronditës dhe në Somali e jo më në Shqipëri dhe në Elbasan, qytetin e arsimit, të Aleksandër Xhuvanit dhe Kostandin Kristoforidhit. Por a tronditet një elbasanlli kur dëgjon që në 5-maj (apo në secilën lagje tjetër të qytetit) blihen vota dhe sekuestrohen karta identiteti nga njerëz me precedentë penalë apo siç i quan populli thjeshtë: kriminelë dhe halabakë? Jo, një elbasanlli nuk përfton asnjë përshtypje dhe ky fakt nuk përbën lajm sepse e tillë është situata aty, është normalizuar blerja e votës prej vitesh. Madje është normalizuar edhe prania e makinave luksoze dhe të blinduara (që do t’i kishin zili dhe yjet e futbollit) në oborret e qendrave të votimit ditën e zgjedhjeve dhe fakti tronditës është jo kur ti mëson se po blihen vota por pikërisht mungesa e përshtypjes kur ti mëson këtë gjë… Kjo është kuja e vërtetë.
-Strukturat apo njësitë e mbrojtjes së votës nga PD-ja
Fakti që një parti politike ngre struktura apo njësi të cilat kanë për detyrë të lokalizojnë dhe të zënë në kushtet e flagrancës votëblerës nga partita kundërshtare do të thotë shumë. Është fakt shqetësues sepse kemi të bejmë me një autoritet alternativ që qarkullon në qytet dhe që mund të jetë potencialisht burim konfliktesh si ai që pamë dje pavarësisht qëllimit solemn të mbrojtjes së votës por siç në SHBA ti ke të drejtë të mbrosh pronën dhe familjen tënde në rast se policia nuk e bën këtë gjë ashtu dhe në këtë spektër duhet të ekzistojëë kjo e drejtë e paligjshme por legjitime. Pse Gazmend Bardhi është i detyruar ta zërë lepurin me qerre kur kjo është detyrë e tjetër kujt, e Policisë së Shtetit që paguhet me taksat tona dhe duhet të na mbrojë votën dhe rendin? Sepse Gazmend Bardhi i denoncoi me emër dhe mbiemër blerësit e votës në qytet dhe i dërgoi në SPAK dhe ç’ndodhi? Asgjë! Heshtje. Asgjë e re nga fronti i perëndimit (perëndimi që ironikisht përkon me Tiranën dhe në këtë rast). Tani nëse policia dhe Prokuroria e Elbasanit (dy prokurorë jo më larg se një muaj më parë deklaruan se u rrezikohet jeta) nuk veprojnë a i lind e drejta një partie politike të mbrojë votat me çuna trima?
-Pyetja e analistëve që nuk i duhej bërë kurrë kësaj opozite por që u bë pafund
Mbetemi këtu: A i lind e drejta një partie politike të mbrojë votat me çuna trima? Pyetja që i është bërë opozitarit Basha para çdo dite zgjedhjesh gjatë 8 viteve opozitë nga analistët e shumtë (Kikia, Bejtja etj. etj.) ka qenë kjo: “Ore ai (Rama) po t’i blika votat, si do e ndalosh ti?” apo diçka e ngjashme: “Si do t’i mbrosh ti votat e qytetarëve?”. Kjo tipologji pyetjeje nuk duhet të ishte bërë kurrë sepse i jep avantazh vetëm atij që i blen zgjedhjet. Pse? Sepse përgjigjet do të jenë dy; ose me dhunë ose pa dhunë; me deklarata televizive, thirrje, denoncime apo demaskime.
Këtë të dytën e kanë provuar opozitarët prej kohësh dhe nuk pi ujë asgjë. Rasti i fundit p.sh denoncimi i Bardhit në SPAK. Asgjëbërësit e SPAK-ut nuk kanë bërë asgjë, asgjë fare! Pra nuk pi ujë kjo rrugë dhe nëse opozita i përgjigjet pyetjes së mësipërme me : do zgjedhim rrugën e fjalës, denoncimeve apo kallëzimeve, pra mjetet ligjore dhe demokratike, shfaq dobësinë dhe pafuqinë e vet.
Nëse i përgjigjet pyetjes së mësipërme me: do ta mbrojmë me forcë, me gjak apo me grupe të posaçme, opozita na del e keqja, e jashtëligjshmja dhe jodemokratikja.
Pra një analist që bën këtë pyetje ose ekspozon opozitën si të plogësht dhe impotente ose e ekspozon si grupim cubash, dhe të jashtëligjshmësh që kanë krijuar njësi paralele për mbrojtjen e votës sigurisht përtej mjeteve ligjore.
-Policia e kastruar ishte aty
Plot 15 policë ishin në vendngjarje kur ndodhi krimi dhe 2 prej tyre, nëndrejtorët më të rëndësishëm të qarkut. E frikshme! Si duhet të ndjehet një qytetar i Elbasanit kur plumbat kërcasin në mes të qytetit, ditën me diell, në prani të 13 policëve të armatosur dhe 2 nëndrejtorëve të policisë? Ndoshta njëjtë si asaj here kur makina e nëndrejtorit të policisë u mor përpara si nëpër filmat e hollivudit dhe policia e kastruar mirë që nuk qiti asnjë plumb por nuk denjoi as të hyjë në pronë private në kushtet e flagrancës.
Sot fakti më i tmerrshëm, ndër të tërë faktet absurde që rrethojnë këtë ngjarje të frikshme është policia asgjëbërëse e Elbasanit. Policia e kastruar që nuk mbron dot as efektivët e saj. Fati e deshi që policja dje u plagos vetëm në këmbë, por vetëm fati sepse eprorët e saj nuk e mbrojtën dot. /Totila Kotorri/
