Ministrja e Financave, Hykmete Bajrami, deklaroi se ka abstenuar në votimin për shkarkimin e Vjosa Osmanit, nga pozitat në LDK.
Në një intervistë për emisionin Interaktiv të KTV-së, Bajrami tha se ky vendim nuk duhet cilësuar si diskriminues ndaj gjinisë. Sipas saj, vendimet e e tilla do t’i vlerësojnë qytetarët dhe do i vlerësojë historia.
“Unë kam votuar, dhe votat janë në LDK. Ka qenë vendim i organeve të partisë, jo vendim i imi personal. Po dua ta shfrytëzoj të drejtën time për të mos komentuar këtë. Nuk besoj se as znj. Osmani e as unë të pranojmë që të jemi viktima për shkak të gjinisë. Vendimet e tilla besoj se do t’i vlerësojnë qytetarët dhe do i vlerësojë historia. Unë e kam dhënë votën. Unë po ju tregoj se kam abstenuar”, tha ajo.
Ajo ka folur edhe për numrin e zëvendësministrave të emëruar, që janë në total 46.
“Në Ministrinë time janë 3 zëvendësministra, është Agim Krasniqi nga LDK, kam një të AAK-së dhe një zëvendësministre nga minoriteti serb. Janë sigurisht formula të koalicionit qeverisës, gjithmonë për të arritur një marrëveshje të koalicionit dhe për të mbajtur atë në periudha të caktuara duhet të bëhen kompromise, ndoshta kjo i është kërkuar LDK-së. Por, besoj se përgjigjen e saktë se qysh ka ardhë deri në 46 numri i zëvendësministrave mund ta japë kryeministri ose Zyra e Kryeministrit”, shtoi ajo.
