Ramiz Alia, i sapozgjedhur në funksionin e Kryetarit të Presidiumit të Kuvendit Popullor të Shqipërisë, ishte përzgjedhur nga Enver Hoxha si pasardhësi i tij në krye të Partisë së Punës. Me sugjerimin e këtij të fundit, ai ndërmori një tur takimesh promovuese në mbarë vendin. Gjatë një tubimi në Has, Sigurimi i Shtetit dha alarmin për një atentat me bombë ndaj tij.
Policia arrestoi 40-vjeçarin Uk Dauti nga fshati Golaj, të cilit thuhet se iu gjet një bombë në xhepin e pantallonave. Bashkë më të u vunë në pranga edhe 40 persona të tjerë pjesëmarrës në atë miting. Kryesisht nga fiset Dauti, Sefolli dhe Mazreku. Pas verifikimeve u ndaluan vetëm 7-8 persona.
Hetimet zgjatën disa muaj. Pas torturave ç’njerëzore, të arrestuarit pranuan se ishin pjesë e “grupi terrorist të lidhur me UDB-në jugosllave”, që kishin si synim vrasjen e Ramiz Alisë.
Në përfundim të gjyqit, Uk Dauti dhe xhaxhaj i tij, Man Dauti, u dënuan me vdekje, ndërsa të tjerët me nga 25 vjet burg. Asokohe Sigurimi i Shtetit, arrestoi edhe një “grup tjetër terrorist” në rrethin e Tropojës, që gjithashtu u akuzua se donte të vriste Alinë.
Dy krerët e këtij “grupi terrorist”, Isuf dhe Skënder Haluca, dënohen me vdekje. Por më pas vetë Ramiz Alia ua fali jetën, duke u dënuar me 25 vjet burg. Në një intervistë të dhënë në vitin 2015, Haluca tashmë gjyqtar në profesion, thotë se atentatet ndaj Ramiz Alisë në Has dhe në Tropojë, ishin një sajesë e Sigurimit të Shtetit.
