Për analistin e njohur Fatos Lubonja, kryedemokrati Lulzim Basha nuk është i rrezikuar nga 3 kandidatët të cilët do të garojnë kundër tij, për postin e kryetarit.
I ftuar në emisionin ”Pikat mbi i”, Lubonja u shpreh se rrezikun më të madh, Basha e ka nga vetja e tij, teksa shtoi se brenda PD duhet të ketë zëra që mendojnë ndryshe.
Sipas Lubonjës, Basha do t’i fitojë zgjedhjet e 13 qershorit, por shpreh dyshimet e tij se si ai do të menaxhojë këtë fitore, dhe se sa do ta hapë partinë në të ardhmen.
Fatos Lubonja: “Kjo fjala ‘sa rrezikohet Basha?’ është interesante për t’u komentuar. Se mendoj se Basha rrezikohet nga këta kandidatë shumë. Do të mendoja se Shehaj mund t’i marrë më shumë vota në votim nga intuita. Por rreziku më i madh që ka Basha, e ka nga vetja e vetë. E para; sepse ajo që është karakteristike e liderëve tanë, rreziku më i madh i tyre. Edhe në terma afatgjata është moshapja ndaj të tjerëve, krijimi i një kulti, rrethimi me ‘yes man’ që të sigurojnë pushtetin por nuk të korrigjojnë gabimet e shumta që mund të bësh. Ky është rreziku kryesor që ka Basha, por edhe Ramës, i cili është drejt katastrofës. Kjo ka qenë edhe fatkeqësia e Enver Hoxhës që sundoi 50 vite, por e patë se ku e çoi Shqipërinë. Duhet të ketë zëra ndryshe, pasi janë interes për demokracinë. Basha këtë ka rrezikun kryesor, se sa do ta hapi partinë nesër. Unë mendoj se me këto zgjedhje ai mund t’i fitojë, nuk rrezikohet. Por rreziku është futorja e tij. Si do të menaxhojë fitoren e tij, sa do të jetë i hapur ndaj këtyre kandidatëve, sa do të hapë partinë.”
Më 13 qershor, Partia Demokratike zhvillon zgjedhjet për kryetarin e ri. Përballë Lulzim Bashës, do të garojnë Edi Harxhi, Agron Shehaj dhe Fatbardh Kadilli.
