Vijojnë të zbulohen të tjera skandale me sigurinë ushqimore të produkteve serbe me destinacion Shqipërinë.
Një sasi prej 4 ton marmalatë e nisur nga Serbia me destinacion qytetin e Shkodrës, është bllokuar për shkak se nuk plotësonte kriteret ligjore për të hyrë në vendin tonë.
Marmalata e ambalazhuar në kova plastike 14 kg, u kishte mbetur afat përdorimi më pak se gjysma e jetëgjatësisë dhe për rrjedhojë nuk plotësonte kërkesat ligjore të parashikuara në pikën 2 të Urdhërit Nr.250, datë 29.07.2011 “Mbi Disa masa për hyrjen në territorin e Republikës së Shqipërisë të produkteve ushqimore” dhe si e tillë nuk ishte e përshtatshëm për konsum.
Në bazë të legjislacionit në fuqi, Autoriteti Kombëtar i Ushqimit nuk lejoi futjen e këtyre produkteve në territorin e Republikës së Shqipërisë dhe ngarkesa me këtë produkt ushqimor u kthye në vendin e origjinës.
“Siguria ushqimore është prioritet i punës tonë dhe për asnjë rast nuk do të ketë tolerim ndaj abuzuesve. AKU shprehet e gatshme për të mos lejuar asnjë praktikë në dëm të konsumatorëve duke nxitur zbatimin e ligjit dhe forcimin e masave parandaluese”, thuhet në një njoftim të AKU-së.
Kujtojmë se para pak kohësh në Shqipëri shpërtheu skandali me miellin serb. Sipas disa mediave u raportua se ky miell përdore për kafshët në Serbi pasi ishte produkt që prej dekadash ishte mbajtur në magazina. Ky miell u fut në Shqipëri dhe u përdor në fabrikat e prodhimit të bukës. Edhe pse kjo shkaktoi një bujë të madhe në vendin tonë, më pas çdo gjë u harrua dhe çështja nuk shkoi deri në fund.
