Humbja e “certifikatës së lindjes”, u ka ndodhur shumë vendeve të mëdha dhe të vogla në botë. Madhe edhe SHBA-ja nuk zotëron sot aktin origjinal të pavarësisë, por njërën nga kopjet. Edhe Shqipëria ka një problem të ngjashëm. Akti origjinal i pavarësisë së shpallur më 28 nëntor 1912 në Vlorë mungon.
Versioni që qarkullon sot, është një riprodhim i këtij dokumenti që u publikua në vitin 1937 nga Lef Nosi, me rastin e 25-vjetorit të pavarësisë. Historianët mendojnë se aktin e mbante deri vonë me vete djali i dytë i Ismail Qemalit, Qazimi, që u largua në Strugë të Maqedonisë, ku dhe jetoi derisa vdiq më 1953.
Një tezë tjetër, pretendon se dokumenti origjinal i pavarësisë, mund t’i jetë dhuruar ish-udhëheqësit jugosllav Josip Broz Titos, dhe se dokumenti historik ndodhet në Arkivin e Beogradit.
Një tjetër tezë e çon Aktin e Pavarësisë më larg, në Perëndim, ku ai mund të jetë mbyllur në ndonjë nga arkivat e Evropës ose të jetë dhuruar. Në kuadër të festimit të 100-vjetorit të pavarësisë në vitin 1912, u pretendua se dokumenti origjinal ishte gjetur në arkivat e pasura të Marubëve në Shkodër, por ky pretendim u hodh poshtë nga ekspertët, sipas të cilëve bëhej sërish fjalë për një kopje.
