Ish-ministri i Brendshëm Saimir Tahiri ka reaguar gjatë mbrëmjes së sotme, në lidhje me vendimin e marrë nga gjykata, me 3.4 vite shërbim prove.
Në një lidhje telefonike me TVSH, Tahiri tha se vendimi ndaj tij është marrë nën shantazh e kërcënime të një pjese të interesuar të politikës. Ish-ministri u shpreh më tej se ai nuk është një njeri i prapaskenave, por i drejtpërdrejtë dhe beson se vendimi që i është dhënë ka qenë me sforco.
“Vendimi ndaj meje ka qenë i sforcuar. Ky vendim u mor nën shantazh e kërcënime. Unë nuk merrem as me shantazhe dhe as me kërcënime. Nuk kam njeri i prapaskenave, sepse po të isha i tillë nuk do isha këtu ku jam e nuk do kisha arritur aty ku kam arritur”, deklaroi Tahiri.
Më tej, Tahiri u pyet se a ndjen ai përgjegjësi për kanabizimin e vendit, për të cilën u përgjigj se:
“Me këtë logjikë i bie që Koço Kokëdhima të ishte në burg që para tre vjetëve, i bie që Sali Berisha të ishte në burg që linte Lazaratin, i bie që ministri aktual i Brendshëm të jetë në burg se në Shqipëri ka kanabis. Unë rezervohem të flas për vendimin e Gjykatës pasi nuk e kam lexuar”.
