Ndërsa pandemia e koronavirusit të ri po vazhdon, dhe e ardhmja e një vaksine mbetet e pasigurt, shumë njerëz po kërkojnë mënyra alternative për të ndërtuar mbrojtjen e tyre kundër këtij virusi. Cilësitë forcuese të sistemit imunitar nga vitamina D, ishin hedhur poshtë më herët.
Por studimet e fundit, kanë bërë që edhe Ministri britanik i Shëndetësisë Met Henkuk të ndryshojë mendje. Henkuk tha së fundmi se qeveria po “forcon mesazhet e saj të shëndetit publik rreth përdorimit të vitaminës D, pas provave shkencore në rritje, se ajo mund të ndihmojë në luftimin e Covid-19”. Por a është vërtetë e efektshme kjo vitaminë kundër koronavirusit të ri, dhe në cilat burime ushqimore gjendet natyrshëm?
A ndihmon vitamina D në luftën kundër koronavirusit?
Po, studimet kanë zbuluar se vitamina D mund ta ndihmojë trupin tonë ta luftojë koronavirusin e ri. Dy studime të reja kanë hulumtuar ndikimin e vitaminës tek kjo sëmundje, me rezultate që ndryshojnë gjithçka.
“Ekziston një lidhje midis vitaminës D, dhe niveleve më të ulëta të koronavirusit”- thotë dr. Majkëll Holik, ekspert i vitaminës D nga SHBA-ja, që kohët e fundit publikoi një studim i cili zbuloi se nivelet e mira të vitaminës D, mund të zvogëlojnë me 54 për qind rrezikun e prekjes nga Covid-19.
Shkolla e Mjekësisë në Universitetin e Bostonit, ka zbuluar gjithashtu se nivelet e larta të vitaminës D, janë të lidhura me një nivel ndjeshëm më të ulët të inflamacionit, dhe nivele më të larta të qelizave imune në gjak, gjë që ndihmon në vrasjen e koronavirusit.
Kjo do të thotë se njerëzit që kanë nivele të larta të vitaminës D, janë më pak të rrezikuar të preken nga ky virus por edhe nga vdekja për shkak të tij. Profesor Smith, nga Qendra për Mjekësi Rigjeneruese, deklaroi për herët për Metro.co.uk:
“Gjatë karantinës, shumë prej nesh nuk po marrin mjaftueshëm vitaminë D – përmes rrezeve të diellit apo dietës – dhe është e rëndësishme që të gjithë të marrin mjaftueshëm vitaminë D3 përmes suplementeve. Përveç mbajtjes së shëndetshme të kockave dhe muskujve, vitamina D3 është shumë e rëndësishme për ruajtjen e një sistemi të shëndetshëm imunitar”.
Po cilat ushqime janë të pasura me vitaminë D?
Tabletat e vitaminës D mund të blihen në farmaci pa recetë. Megjithatë, ju mund të filloni
të përfshini në dietën tuaj edhe ushqime të pasura me vitaminën D. Salmoni dhe kërpudhat janë burime të mira të vitaminës D. Po ashtu edhe mëlçia, të verdhat e vezëve etj.
Vegjetarianët apo veganët mund të konsumojnë kërpudhat, qumështin e bajames, margarinën dhe qumështi i sojës. Pavarësisht nga bindja popullore, qumështi i lopës nuk konsiderohet një burim i mirë i vitaminës D.
Cilat janë burimet e tjera të vitaminës D?
Marrja e rrezeve të diellit mund të rrisë nivelet e vitaminës D. Dielli rrezaton rrezet ultravjollcë, të cilat përthithen nga lëkura jonë. Dhe kjo mund të shpëtojë shumë mirë jetën tuaj. Në uebsajtin zyrtar të Shërbimin Shëndetësor Kombëtar në Britani (NHS) thuhet: “Shumica e njerëzve mund të marrin mjaftueshëm vitaminë D duke u ekspozuar çdo ditë ndaj Diellit për periudha të shkurtra me parakrahët, duart ose këmbët e poshtme të zbuluara, pa asnjë krem mbrojtës nga fundi i marsit ose fillimi i prillit deri në fund të shtatorit, veçanërisht nga ora 11 e mëngjesit deri në orën 3 pasdite”.
Meqenëse tani po vjen dimri, mund të ndiqni metodat alternative të marrjes së vitaminës D. Deputeti laburist Rupa Huk, që ka qenë një përkrahës i fortë i vitaminës D që nga fillimi i pandemisë, deklaroi të enjten në Dhomën e Komunëve:”
“Ajo që duhet të ndodhë tani, është që të gjitha grupet shoqërore që kanë mangësi të vitaminës D, dhe janë të rrezikuar ndaj Covid-19 më shumë se të tjerët, përfshirë të moshuarit, pakicat me ngjyrë, obezët dhe ata me sëmundje bashkë-shoqëruese si diabeti, duhet t’u jepen suplemente shtesë të vitaminës D”.
Burimi i lajmit: https://metro.co.uk/2020/10/16/vitamin-d-help-fight-coronavirus-foods-sunlight-sources-tablets-covid-uk-13431859/?ito=ne%C3%ABsno%C3%AB-feed
Përshtatur nga TIRANA TODAY
