Pandemia e koronavirusit, ka frikësuar shumë njerëz. Javët e fundit, kanë lindur shumë teori konspirative, mbi origjinën dhe përhapjen e shpejtë të koronavirusit.
Më popullorja prej tyre, pretendon se Covid-19 është shkaktuar ose ndihmuar të përhapet nga teknologjia 5G e telefonisë celulare. Përhapësi kryesor i saj është konspiracionisti i njohur David Icke. Sipas tij, nuk është rastësi që teknologjia 5G u instalua për herë të parë në Kinë, dhe pikërisht në qytetin e Vuhanit, ku shpërtheu në fillim epidemia.
Më pas ajo u mbështet edhe nga disa mjekë. Arsyetimi i tyre është se teknologjia 5G, dëmton seriozisht sistemin imunitar të njeriut, duke bërë shumë njerëz viktima të koronavirusit.
Të frikësuar, shumë njerëz e kanë mbështetur dhe përhapur masivisht këtë tezë në rrjetet sociale. Për pasojë, ditët e fundit në Britaninë e Madhe, janë sulmuar dhe u është vënë flaka të paktën 20 antenave të rrjetit 5G.
Raste të ngjashme, u raportuan të martën edhe në Spezia të Italisë. Ndërkohë në shumë vende, janë nënshkruar peticione që u kërkojnë qeverive të heqin dorë nga kjo teknologji e përparuar. Po a është vërtet i rrezikshëm rrjeti 5G?
Ekspertët thonë se në dallim në rrjetet 4G dhe 3G, rrjeti 5G përdor frekuenca në intervale shumë të larta, 30-300 Gigahertz. Por ata garantojnë se ato nuk prodhojnë energji të mjaftueshme, për të prishur lidhjet kimike në qelizat apo indet e njeriut.
Prandaj rrezatimi i kësaj teknologjike, quhet rrezatim elektromagnetik “jo-jonizues”. Rrezatimi 5G, nuk mund të depërtojë në lëkurë, apo të lejojë depërtimin e një virusi sikurse pretendohet.
Deri tani, nuk ka asnjë provë bindëse se frekuencat e rrjetit 5G, shkaktojnë ose përkeqësojnë përhapjen e koronavirusit. Nisur nga incidentet e kohëve të fundit, Youtube është angazhuar të fshijë nga platforma e vet shumë nga videot që lidhin teknologjinë 5G me COVID-19.
TIRANA TODAY
