Kryetari i LVV, Albin Kurti ka komentuar takimin e tij disaorësh që zhvilloi mbrëmjen e djeshme me kryeministrin Edi Rama.
Në një prononcim për mediat, nga Samiti i Paqes për Evropën Juglindore, Kurti tha se biseduan për çështje të përbashkëta dhe për një bashkëpunim sa më të mirë mes vendeve.
“Biseduam për çështje të përbashkëta, dhe për çështjet e viseve tona, duam që në aspektin e politikës së jashtme dhe ekonomisë të kemi një bashkëpunim më të mirë. Mundësitë që kemi si qeveri dhe nevojat që kanë qytetarët, janë shumë më të mëdha se realiteti që kemi krijuar, duam të krijojmë sa më shumë ura që të ndihmojmë shqiptarët të mos jenë më të nëpërkëmburit në Ballkan. Minishengeni ballkanik më ngjan më shumë si një ide, sesa një projekt”, tha ai.
Kurti mohoi para gazetarëve se në takim të ishte folur për padinë që do të ngrejë Rama në drejtim të Ramush Haradinajt. Ai u pyet edhe nëse janë thyer akujt mes tij dhe kryeministrit Rama. Kurti deklaroi se ndasitë mes tyre janë normale, po ata duhet të bashkëpunojnë, në mënyrë që shqiptarët të mos jenë më të nëpërkëmbur në Ballkan.
Sipas tij, Rama nuk ka qenë për shkëmbimin e territoreve mes Kosovës dhe Serbisë, por për një dialog mes dy vendeve, që do të ishte në favor të të gjithë anëtarëve të Ballkanit Perëndimor.
“Ne nuk kemi pasur marrëdhënie të çrregulluara, jemi njerëz dhe politikanë të ndryshëm, duam që të punojmë që diferencat që kemi mos të pengojnë detyrat tona.
Dialogun e ardhshëm me Serbinë do ta drejtoj unë si kryeministër i Kosovës, nuk pritet që të ketë marrëveshje përpara zgjedhjeve që do të mbahen në Serbi në pranverën e ardhshme.
Tarifa do të zëvendësohet me reprocitet, le ta lëmë Serbinë që të flasë vetë si do të veprojë”, deklaroi kreu i LVV.
