Shumë lajme të rreme po qarkullojnë në internet, se mushkonjat shpërndajnë koronavirusin. Për të qetësuar qytetarët, një reagim ka ardhur nga Ministria e Shëndetësisë së Francës.
Institucioni shëndetësor francez, ka bërë me dije se koronavirusi nuk mund të transmetohet përmes mushkonjave, pasi është virus respirator, raporton Le Parisien. Ministria e Shëndetësisë e ka parë të arsyeshme t’ua rikujtojë qytetarëve, se koronavirusi nuk mund të përhapet nga mushkonjat.
“Koronavirusi është virus respirator, i cili mund të përhapet vetëm nëpërmjet spërklave dhe kontakti me duart e palara”, shkruhet në postimin e llogarisë zyrtare të MSH-së franceze në Twitter.
Vendi i parë në botë për numrin më të lartë të viktimave është SHBA-ja. Në Amerikë deri më tani janë shënuar 23.644 viktima dhe 587.155 persona janë prekur nga virusi.
Virusi është përhapur gjerësisht edhe në Europë. Numri i viktimave në Itali ka shkuar në 20.465. Në këtë shtet janë aktualisht të infektuar 159.516 persona. Në Spanjë kanë humbur jetën 17.756 persona dhe janë infektuar 136.779 të tjerë.
