Zyrtari i Parlamentit Evropian, David McAllister, i është shmangur pyetjes nëse pas zgjedhjeve të Rithemelimit më 22 maj, njeh Sali Berishën si kryetar të Partisë Demokratike. Në një konferencë për shtyp, ai tha se ndodhet në Tiranë si kreu i Komisionit Parlamentar i Çështjeve të Jashtme në PE, dhe jo si zv. President i PE për të komentuar mbi zhvillimet në PD.
“Kam simpati për Shqipërinë dhe shqiptarët. Jam këtu si kreu i delegacionit për Çështjet e Jashtme. Nuk është vendi këtu për të komentuar për zhvillimet e brendshme të Partisë Demokratike. Do të kemi javën që vjen një konference në Roterdam, jam i sigurt se do të bisedojmë dhe për çështjet me Shqipërinë.
Të jeni të sigurt se në kapacitetin tim si anëtar i CDU, po i ndjekim të gjitha zhvillimet në PD nga afër dhe do përpiqemi të japim mbështetjen tonë si EPP që të tejkalohen dallimet ose ndasitë”, tha kryetari i Komitetit të Jashtëm të Parlamentit Evropian.
