Ministrja e Ekonomisë dhe Financave Anila Denaj në një intervistë televizive deklaroi se shtyrja ose jo e orarit të mbylljes së bareve dhe restoranteve pas orës 17:30, do të vendoset në fund të muajit.
Ajo theksoi se gjithçka do të varet nga ecuria e pandemisë.
“Ky 10-ditësh duhet të jetë në favor të biznesit për t’u bërë gati. Vendimmarrje për orarin deri në 17:30 nuk do të jetë e vazhdueshme, por për të parë ecurinë dhe mund të ndryshojë brenda dy javësh në varësi të shifrave. Nëse deri në fund të muajit edhe me hapjen e restoranteve nuk kemi rritje të shifrave, besoj se lehtësimi do jetë edhe më i zgjeruar. Biznesi nuk ka qenë si do jetë dhe kjo nuk është vetëm në Shqipëri. Të gjithë ne po mendojmë si të qasemi në këtë situatë”, u shpreh Denaj.
Kujtojmë se qeveria ka parashikuar hapjen e restoranteve dhe bareve pas 18 majit, mirëpo një shqetësim për pronarët e bizneseve të këtij sektori mbetet kufizimi i orarit.
Pas rihapjes ata do të qëndrojnë të hapur deri në orën 17:30, për këtë, Shoqata e bareve, restoranteve dhe club-eve kërkon shtyrjen e orarit deri në 1:00 pas mesnate.
Mësohet se në një letër dërguar kryeministrit Edi Rama, kërkohet gjithashtu ulja e TVSH-së në të njëjtin nivel si sektori i turizmit dhe agroturizmit.
